街上滿佈月餅廣告，看看月曆原來下月6日才是中秋正日。我家買月餅只為自用，所以每年都是1盒起2盒止，滿街新奇有趣的月餅口味都是眼看就夠了。雖然口味越出越多花樣，我的最愛還是傳統雙黃白蓮蓉月(先不理健康問題)，就如新年一定要有椰汁年糕一樣(一啡一白)少了節日就不美滿。可是美味的白蓮蓉實在太油膩，近年已轉向卑鄙(十分喜歡這樣稱呼冰皮月餅…嘻嘻)月餅懷抱。

由於家父家母對做節不太執著，小時候做節大局都由女麻女麻主持。中秋前些日子她就會買齊一堆做節的貢品(別問我是甚麼，多到完全記唔晒)拜神，同時又會買定些正宗中式餅家(她是已執笠的「奇馨餅家」忠實粉絲)出品的月餅，鐵盒上永遠是印著美女嫦娥乙件。另外她總會買棋子餅和豬籠餅給我和小弟，其實我愛吃棋子餅更甚於月餅。話說棋子餅是細細個月餅狀，口感有點像麥維他消化餅做的芝士餅底(不過棋子餅硬啲)，甜甜的但好癡牙；而豬籠餅就是棋子餅的中秋special，其實是整成豬狀的棋子餅而已，不知何解放進「籠」型的膠笠中(而顏色唔係螢光粉姐就係綠，選擇唔多)再加條紅色絮絮，未知是否最豬籠入水之意？ANYWAY，這餅女麻女麻未走人就被我吃清光，因為真的很美味﹗而那紅色的絮絮就給我掛在頭上扮清朝格格。哈哈。

到時到候，老爸就會將珍藏的兩盞走馬燈掛出來，據他說在我和小弟出世時各買了一盞…真係唔多明有咩關係…不過插上電源後轉轉轉的透出不同圖案確是賞心悅目。但自某年大掃除掉了之後再無補貨(要買都唔平了)。

到正日，首先要到女麻女麻家食個飯，之後就係重頭戲—食月餅。唔好講笑，我們對待這環節是非常認真，首先端出一雙黃白蓮蓉月乙個，將之切開8份，然後每人取一件鬥多黃﹗不過拿著件全蓮蓉都唔會被罰既，打打牙較而已。此奇怪習慣養食本人愛食黃，完全唔理其膽固醇之高，食咗先算，最多飲多兩啖茶消滯。

中秋節另一重要項目就是玩燈籠，話說細個時會相約左鄰右里同學街坊一齊到公園玩，初時玩紙燈籠(曾經樓下管理處年年都有摺疊式燈籠派的說)，後來就玩入電的著燈燈籠，之後更有啪一聲呦斷變螢光的粉絲螢光捧。不過如此FING燈籠食月餅生果楊桃絕對捱唔到一個夜晚，一眾無聊細路將明明點在燈籠內的蠟燭點在地上(前世未點過蠟似的)，排成不同形狀(同時可配《一點燭光》做背景音樂)，然而點蠟燭亦都係唔可以消磨一晚，於是細路們就開始拎個月餅盒燒下紙燒吓蠟…即係煲蠟﹗其實都唔知有咩好玩，而且好危險，我等細路玩到興起唔知死，好在某師奶眼明手快淋熄咗，否則可能我已無命係度打BLOG了(TOUCHWOOD)。某年因為趕住返屋企睇《包青天》還是《梅花三烙》(忘了是那一套…)沒有參加此等「營火晚會」，此後幾年亦很多到街上玩蠟燭了，一來覺得實在無無聊聊，而且清理費時，所以我支持食環署禁煲蠟，一為安全二為市容，不如玩第二啲啦。

 
^楊桃和兔仔燈籠堪稱小時候經典燈籠款，小朋友個個拎住個點了蠟燭的燈籠周圍走，其實都好危險。今日無啦啦搵到右邊既曼聯燈籠，如果有AC我實買﹗我諗今年燈籠都係KERORO架啦…

近幾年家中一齊從簡，做節沒以前的隆重其事，月餅亦由傳統雙黃月變做卑鄙月餅，雖然蛋黃的味道淡了，清淡的綠豆蓉配雙黃出來感覺不俗，而且仍然可以玩我家最愛的蛋黃鬥大遊戲。不經不覺老媽支持卑鄙月餅始祖「大PAN」多年，但對其他新口味就保持審慎態度。首先媽媽覺得雪糕月餅「咪即係雪糕加個古古力皮」，但個價錢貴成個開有突，所以唔試；各式生果味一律無試，理由是「咪即係食生果芭菲﹗」，上年在公司試過一盒「聖ANNA」的生果迷你月，試完各種奇怪生果味道後我覺得生果芭菲絕對比月餅版好食百倍，唔使ENCORE；個人覺得芝麻加埋卑鄙出呢幾好味。今年甚麼TIRAMISU、楊枝金露味我諗都會幾好味，不過礙於我頂個代言人唔順(那句「幸せね」真係讀得好難聽﹗)，所以唔試。

講開「聖ANNA」，前幾年他們有個廣告的歌曲係大班阿姐以戲曲腔高唱著：嫦娥應悔竊藥丹，將錯事鑄成~~~~~~~印象好深，如果可以搵番首歌仔出呢應吓景就好了~~

唔知媽媽幾時入貨呢，諗起都想食番個卑鄙…
--------------------------------------------------------------
有關中秋：
中秋起源
《情陷豬籠餅》(借了此網豬籠餅一相一用…)
進食月餅安全貼士(好貼心的食環署啊﹗)
迷你黏土月餅(好得意﹗又貼埋先…)