首先恭喜千fa榮升丁太…
想說的是，千fa，我支持咗你咁多年，你係陪住我長大的(雖然《陪我長大》係容天后的歌…哈)，見到你嫁得出真係好開心架(前幾年的《電光幻影》、《single》那幾張碟怨味幾勁呀﹗)…。點都好啦，其實我想講的是…華星、新藝寶直到金記，每張碟我都係抱住期待的心情去聽的，今次居然係抱著掃雷的心情去聽，百感交雜…百感交雜呀﹗
呢張碟係完全無期望，但見博友的文章狠批後…掃雷小組組長(即係我﹗)就忍不住出動了，對一個自己曾經很喜歡很支持的歌手…今日居然係掃雷為出發點去聽﹗百感交雜呀﹗真係好雷，個封面已經很雷了…想點？個POSE個角度啲對比光暗完全係一張唔知點的相…(狠批了…)
01. 真命天子
舞曲曲式底，配埋勁襯楊小姐的歌詞，是度身訂造的吧(諗起劉華的《長途伴侶》…)此曲少有高音位，唱既和聽既都舒服，但要聽多幾次先記得首歌…不過整體係OK的，唔雷。
02. 我在橋上看風景
第二主打，歌詞可咀嚼度真係不比以前的歌(唉，又要講以前了…)，以A記出品已經算係OK架啦，係《集體回憶》、《撈月亮的人》質素囉，個人比較喜歡這首(但其實都好公式罐頭吓的K歌…)多於前一首《真命天子》(我諗起無記有套劇都係呢個名的…哈)，都唔多雷的。
03. 原來過得很快樂
剎有介事的說是《再見二丁目》的下集就比較架啦﹗當再不是少不更事的少女，長大了就知其實自己已經過得快樂咁，懂得珍惜捉住眼前的快樂，幾sweet的，不過係…硬拉上舊作做乜丫，又比較架啦…，呢首都唔雷的。
04. 你幸福嗎
嘩，呢首大雷﹗係超大雷﹗超超大大大雷，「鍊」起把聲唱的輕爽快歌…如果係《三分鐘戀愛熱度》年代的千fa唱就ok囉，中間的「啦啦啦啦啦…你幸福嗎？」勁台式偶像甜姐兒歌feel囉…十個驚…囧﹗大雷﹗(我癲了…)
05. All About Love
兩年前千fa演唱會時plug的，當時很喜歡這首歌，想話喺A記出品而言真係好高質素吓。但點解一路都唔收錄喺之後的大碟度，事隔兩年後先出番呢？﹗勁騎呢喎﹗想說呢首係幾有《Unlimited》那種自愛自憐的感覺，怎麼呢首好野反而要坐冷板櫈呢？﹗點解呀﹗呢首一啲都唔雷架﹗
06. 麥芽糖
對舊物憶舊情，詞曲唱都係ok的，但聽一次唔會記得，不過又唔會嚇到想飛咁囉，像前兩張碟的《陌路》、《只談風月不談戀愛》一類typical得很的，唔雷的。
07. 藍風箏
成首歌最雷係個唱腔，點解要好似《你幸福嗎》咁「鍊」住呢？﹗最雷係呢樣囉。
08. 對木偶唱歌
一見個歌名諗起《木偶奇遇記》…不過呢首《對不偶唱歌》完全唔係那回事，聽完覺得似80年代既歌(尤其是中間一段bass…)…。也是一首唔會難頂到想飛，但又唔會有印象既歌，唔雷既…。
09. 孖公仔
同是姊妹同爭一男，李峻一經曾出過一首從第三者出發的《電燈膽》，撇除原唱者的演譯，實在比這首從被姊妹搶走男友的第一身歌曲到肉得多，這首歌我聽完也是沒太大印象，對歌詞的內容都係睇番文字先寫得出上面的幾句…又是一首不會難頂到想飛，但又唔會有好深印象的歌，唉，都唔知係雷定唔雷…(啲高音位幾雷的﹗)
10. 圓缺 (OT:-撈月亮的人)
這首可以做台式愛情劇(一定要婆婆媽媽要生要死那種)的主題曲﹗)…有一點先入為主，覺得廣東版好像有詩意一點…都唔太雷既…
11. All About Love (Little Orchestra Mix)
新藝寶到金記初期千fa唱片成日玩音樂盒和舞曲的(以前鐘意玩童話feel既野嘛…)東東，現下合在呢首remix度又唔錯喎，主打係，本身首歌我覺得很不錯的﹗哈﹗
***************************************************
兩年前寫《Meridian》後感時問過A記係咪想將千fa變成一個集體回憶…看來是了…囧。呢張新碟，umum…就如個封面一樣，白茫茫的，淡淡然的，聽完…啊…聽完啦？﹗咁係咁囉。算不上大雷，但又不會令人有想去買的衝動(moov真令人感動﹗)，就係咁囉。
我都係繼續煲hocc、swing和rubberband好了。
其他博文：
alexbb：做人情：楊千嬅《原來過得很快樂》
3C music：敷衍鬥敷衍，嬉笑怒罵楊千嬅【原來過得很 快樂】
